24 июня/7 июля. Рождество честнаго славнаго Пророка, Предтечи и Крестителя Господня Иоанна.
Тропарь, глас 4: Пророче и Предтече пришествия Христова, достойно восхвалити тя недоумеем мы, любовия чтущии тя: неплодство бо рождшия, и отчее безгласие разрешися славным и честным твоим рождеством, и воплощение Сына Божия мирови проповедуется.
Кондак, глас 3. Подобен: Дева днесь: Прежде неплоды, днесь Христова Предтечу раждает, и той есть исполнение всякаго пророчества: Егоже бо пророцы проповедаша, на Сего во Иордане руку положив, явися Божия Слова Пророк, Проповедник, вкупе и Предтеча.
25 июня/8 июля. Святых Мучениц Леониды, Ливии и Евтропии. Тезоименитство Благоверной Государыни ВЕЛИКОЙ КНЯГИНИ ЛЕОНИДЫ ГЕОРГИЕВНЫ.
Тропарь, глас 4: Мученица Твоя, Иисусе, Леонида, зовет велиим гласом: Тебе, Женише мой, люблю, и Тебе ищуще страдальчествую, и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою: но яко жертву непорочную приими мя с любовию пожершуюся Тебе: тоя молитвами, яко милостив, спаси души наша.
26 июня/9 июля. Явление иконы Пресвятыя Владычицы нашея Богородицы и Приснодевы Марии, Тихфинския.
Кондак, глас 8: Притецем, людие, к девственней Богородице Царице, благодаряще Христа Бога, и к Тоя чудотворной иконе умильно взирающе припадем, и возопием Ей: О Владычице Марие! Чудесно спасай в мире и благовременстве Верную ВЕЛИКУЮ КНЯГИНЮ нашу, и вся Христианы, наследники показующе небесныя жизни. Тебе бо верно зовем: радуйся, Дево, мира спасение.
29 июня/12 июля. Святых славных, и всехвальных, и первоверховных Апостол Петра и Павла.
Тропарь, глас 4: Апостолов первопрестольницы, и Вселенныя учитилие, Владыку всех молите мир Вселенней даровати, и душам нашим велию милость.
Кондак, глас 2: Твердыя и Боговещанныя проповедатели, верх Апостолов Твоих, Господи, приял еси в наслаждение благих Твоих и покой: болезни бо онех и смерть приял еси паче всякого всеплодия, едине сведый сердечная.
4/17 июля. Святых Царственных Мучеников и иже с ними пострадавших.
Тропарь, глас 5: Царства земнаго лишение, узы и страдания многоразличная кротко претерпел еси, свидетельствовав о Христе даже до смерти от богоборцев, Страстотерпче великий Боговенчанный Царю Николае, сего ради мученическим венцем на небесех венча тя с Царицею, и Чада, и слуги твоими Христос Бог, Егоже моли помиловати страну Российскую и спасти души наша.
Кондак, глас 6: Надежда Царя Мученика с Царицею, и Чады и слуги укрепи, и к Твоей любви окрыли, будущий им покой предвозвестивши, тех молитвами, Господи, помилуй нас.
5/18 июля. Обретение честных мощей Преподобнаго и Богоноснаго отца нашего Сергиа Игумена Радонежскаго Чудотворца.
Кондак, глас 8. Подобен: Взбранной: Днесь яко солнце пресветло, возсиявше от земли честныя мощи твоя, нетленны обретошася, яко благоуханный цвет, множество чудес сияюще, и всем верным источающе различныя изцеления, и веселяще избранное твое стадо, еже мудре собрав, и добре паствил еси. О них же и ныне Троице предстоиши моляся, и ВЕЛИКОЙ КНЯГИНЕ победительная на враги даровати, да вси вопием ти: радуйся, Сергие Богомудре.
10/23 июля. Положение Честныя Ризы Господа Бога и Спаса нашего Иисуса Христа, яже есть Хитон, в царствующем граде Москве.
Тропарь, глас 4: Днесь притецем, вернии, к Божественней и цельбоносней ризе Спасителя нашего Бога, благоизволившаго сию плотию носити, и на Кресте святую Свою кровь излияти, еюже искупи нас от работы вражия. Тем же благодаряще вопием Ему: спаси Православную ВЕЛИКУЮ КНЯГИНЮ нашу МАРИЮ ВЛАДИМИРОВНУ, и святителей, и град, и вся люди честною Твоею Ризою защити, и спаси души наша, яко Благ и Человеколюбец.
15/28 июля. Святаго Равноапостола Великаго Князя Владимира, нареченнаго во святом крещении Василиа.
Тропарь, глас 4: Уподобился еси купцу, ищущему добраго бисера, славнодержавный Владимире, на высоте стола седя матере градов, Богоспасаемаго Киева: испытуя же и посылая к Царскому граду уведети Православную Веру. И обрел еси безценный бисер Христа, избравшаго тя, яко втораго Павла, и отрясшаго слепоту во святей купели, душевную, вкупе и телесную. Тем же празднуем твое успение, людие твои суще: моли спастися Державе твоей Российстей, Христолюбивой ВЕЛИКОЙ КНЯГИНЕ, и множеству владомых.